2 Februarie 2022
Die departement van gesondheid in KwaZulu-Natal sê hulle ondersoek ‘n voorval waarin 46 kinders van ‘n skool in KwaMaphumulo na bewering siek geword het nadat hulle stokkielekkers geëet het.
Die departement se woordvoerder, Agiza Shangwani sê dié lekkers is glo deur iemand by die Umbozane Laerskool verkoop.
Hy sê gerugte dat van die kinders dood is, is onwaar, maar hulle is wel met naarheid en maagkrampe na ‘n plaaslike kliniek geneem. Shangwani sê die departement is bekommerd oor ‘n video, van kinders in pyn, wat op sosiale media versprei word.
Volgens hom is die kinders ontslaan en sterk by hulle huise aan. “Die bewerings dat van die kinders dood is, is onwaar en onverantwoordelik. Dit saai onnodig paniek.” Hy sê die ondersoek duur voort.
