3 Februarie 2022
Die Nasionale Seereddinginstituut (NSRI) het gisteroggend (2 Februarie) 35 wilde perde uit die Oranje Rivier, wat in vloed is, gered.
Die NSRI se woordvoerder, Craig Lambinon sê die perde was gister vasgekeer op ‘n klein eiland in die middel van die rivier in die omgewing van Aleksandra Baai. Lede van die organisasies, Have a Heart en Network for Animals het saam met die NSRI gewerk.
Hy sê daar was op die een eilandjie nie genoeg plek vir al die perde nie, wat beteken hulle moes swem tussen gebiede waar hulle uit die water kon kom. Drie van dié perde is vulletjies.
Volgens Lambinon was dit ‘n uitdagende reddingsoperasie weens die groot gebiede waaroor die perde verspreid was. Al 35 perde is egter veilig.
