17 Mei 2024
‘n Johannesburgse man is skuldig bevind op aanklagte van aanranding met die doel om ernstig te beseer nadat hy ‘n 80-jarige vrou verlede jaar in haar huis in Mayfield in die suide van die stad aangeval het.
Volgens AfriForum se privaatvervolgingseenheid is Dylan Ferreira (28) in die Booysens-landdroshof skuldig bevind.
Die eenheid se woordvoerder, Barry Bateman sê op 5 Augustus 2023 het ‘n stryery ontstaan oor ‘n stel spaarsleutels vir ’n eiendom wat Ferreira en sy verloofde Kay-Leigh Pelser by die Oosthuysen-egpaar gehuur het.
Te midde die argument het Ferreira die 80-jarige Lucille Oosthuysen gestamp waarna sy op die plaveisel beland het. Ferreira het egter getuig dat hy in selfverdediging opgetree het.
Landdros Nicola Olivier het tydens haar uitspraak die voorval as brutaal en ontstellend beskryf. “Die klaagster, wat toe 79 jaar oud was, is ‘n brose bejaarde dame wat stilgestaan het.”
Die saak is uitgestel to 5 Junie 2024 vir die vonnisoplegging.
