21 Desember 2021
26% van die regering se aanstellings in senior bestuursposte het nie die regte of vereiste kwalifikasies vir die pos wat hulle beklee nie.
Dít is volgens regeringsrekords wat deur die minister van staatsdiens en administrasie, Ayanda Dlodlo, onthul is in antwoord op ’n parlementêre vraag van die DA-LP, Mimmy Gondwe.
Die syfer het wel afgeneem van April vanjaar toe dit op 35% gestaan het.
Die 9%-afname word toegeskryf aan die bywerking van senior bestuur se kwalifikasies op die regering se personeelstelsel, Persal.
Senzo Mchunu – by wie Dlodlo die leisels oorgeneem het – het in April die departement van landbou, grondhervorming en landelike ontwikkeling, die departement van polisie, die departement van justisie en grondwetlike ontwikkeling, die departement van handel, nywerheid en mededinging asook omgewingsake, bosbou en visserye as die skuldiges uitgewys.
Dlodlo sê haar departement sal die datavaslegging betreffend kwalifikasies deurgaans dophou en sal daarvolgens ’n ingeligte besluit neem of enige verdere ondersoeke geregverdig is.
Fotokrediet: Gallo Images
