28 April 2022
Die minister van vervoer Fikile Mbalula het vanoggend die sterftesyfer tydens die afgelope paasnaweek bekend gemaak.
Hy het tydens ‘n mediakonferensie gesê dat dieselfde hoeveelheid mense die afgelope paasnaweek van die land se besigste paaie gebruik gemaak het, maar in KwaZulu-Natal het die verkeer met 21% afgeneem weens die vloede wat die provinsie getref het.
Volgens hom het die aantal ongelukke met 28,6% afgeneem en die aantal sterftes het met 31,5% afgeneem. Hy sê sewe van die land se provinsies het ‘n afname in die hoeveelheid padsterftes getoon, met die Wes-Kaap en Mpumalanga wat die uitsondering is.
- Mpumalanga: 23 padsterftes teenoor verlede jaar se 18 sterftes. Toename van 27.8%
- Wes-Kaap: 34 steftes teenoor 26 in 2021. Toename van 30,8%
- KwaZulu-Natal: 21 sterftes teenoor 54 in 2021. Afname van 61,1%
- Noord-Kaap: 3 sterftes die jaar teenoor 7 in 2021. Afname van 57,1%
- Vrystaat: 6 sterftes die jaar teenoor 13 in 2021. Afname van 53,8%
- Noordwes: 11 sterftes die jaar teenoor 20 in 2021. Afname van 45%
- Limpopo: 19 sterftes die jaar teenoor 34 in 2021. Afname van 44,1%
- Gauteng: 24 sterftes die jaar teenoor 36 in 2021. Afname van 33,3%
- Oos-Kaap: 20 sterftes die jaar teenoor 27 in 2021. Afname van 25,9%
‘n Totaal van 162 mense is tydens Paasnaweek oorlede in vergelyking met 235 sterftes verlede jaar. 134 ongelukke is aangemeld teenoor 189 ongelukke in 2021.
Ten opsigte van die grasietydperk vir rybewyse wat verval het tussen 26 Maart 2020 en 31 Augustus 2021 het Mbalula motoriste herinner dat die grasietydperk vir die hernuwing daarvan volgende week tot ‘n einde kom. “Ek doen ‘n ernstige beroep op motoriste om hulle rybewyse te hernu omdat daar ná volgende week géén verdere uitstel sal wees nie.”
Hy sê lisensiekantore se werksure is met twee ure verleng gedurende die week en sal ook elke Saterdag en Sondag oop wees tot 31 Mei 2022.
“Daar is tans ‘n agterstand van 1,3-miljoen rybewyse.”
