19 Junie 2023
President Cyril Ramaphosa se veiligheidswagte en joernaliste wat veronderstel was om hom na die oorloggeteisterde Oekraïne en Rusland te vergesel, is terug by die huis, nadat hulle in Pole voorgekeer is.
Die nagenoeg 120 mense – wat bestaan het uit elf plaaslike joernaliste en meer as 90 lede van die Suid-Afrikaanse Polisiediens en die Suid-Afrikaanse Nasionale Weermag, is deur Poolse doeanebeamptes voorgekeer weens die aard van wapens wat hulle saamgeneem het.
Hulle het Sondagaand net ná 21:00 by die Waterkloof-lugmagbasis in Pretoria aangekom.
Intussen is president Ramaphosa ook terug in die land – na wat hy as ‘n suksesvolle sending beskryf het – ná onderhandelings met die Russiese president, Wladimir Poetin en sy Oekraïense eweknie, Wolodimir Zelenski.
Nie een van dié twee leiers het aangedui dat hulle te vinde is vir die voorstelle wat deur die Afrika-leiers gemaak is.
Foto: Pieter du Toit (News24)
