1 Augustus 2022
Die Tshwane-metro se energie- en elektrisiteitsdepartement het meer as 1000 onwettige kragverbindings in Lotus Gardens in die weste van die stad ontkoppel.
Die burgemeester, Randall Williams sê in ‘n verklaring dat metro-beamptes en die polisie saamgewerk het om die kwessie van onwettige kragverbindings in die weste aan te pak.
Volgens Williams is die gebied een van die gebiede wat se kragnetwerk oorlaai is weens die talle onwettige verbindings. Hy sê daar is ook vyf mini substasies waarmee daar gepeuter is.
Hy sê onwettige elektriese toerusting ter waarde van R750 000 is in beslag geneem. Williams sê die metro sal hierdie operasie in ander dele van Pretoria voortsit. Hy het egter besigheidseienaars- en huishoudings herinner aan die metro se amnestie program wat vandag afskop.
Mense, wat skuldig is aan onwettige verbindings het nou een kans om aansoek te doen vir amnestie by die metro.
