Naledi Pandor verdedig terugroep van diplomate uit Israel

Deur on

7 November 2023

Die minister van internasionale betrekkinge Naledi Pandor sê dit is standaard praktyk vir ‘n land om sy diplomate te onttrek uit ‘n gebied, in gevalle waar hy bekommerd is oor ‘n oorlogsituasie.

Pandor het gereageer op die aankondiging gister dat die kabinet besluit het om Suid-Afrika se oorblywende diplomate uit Tel Aviv in Israel te onttrek. Sy sê die regering is bekommerd oor die duisende inwoners van die Gasastrook wat reeds dood is in Israeliese aanvalle op die gebied.

Sy het ook gesê sy sal binnekort vergader met Israel se ambassadeur na Suid-Afrika, Eliav Belotserkovsky, oor sy uitsprake.

LEES OOK: SUID-AFRIKAANSE DIPLOMATE UIT ISRAEL ONTTREK

Pandor sê hy moenie enige uitsprake maak oor die Suid-Afrikaanse regering, sonder om eers met hulle in gesprek te tree nie. Die kabinet het aanbeveel dat daar streng teen hom opgetree word.

Intussen het die VF Plus-leier, dr. Pieter Groenewald in reaksie gesê dat die regering se besluit ‘n rookskerm is om alle diplomatieke bande met Israel te verbreek. Hy sê dit sal nadelige gevolge vir die land inhou, met sterk sake- en ekonomiese bande wat ook moontlik verbreek sal word.

Ook die voorsitter van die Suid-Afrikaanse Joodse Raad van Afgevaardigdes, professor Karen Milner, sê die besluit is in stryd met alles wat die regering aanvoer hy voor staan, soos dat hy albei kante van die konflik in ag neem.

Milner het ‘n vergadering met president Cyril Ramaphosa versoek om duidelikheid te verkry oor presies waarom die kabinet reken Belotserkovsky se posisie is “onhoudbaar”.


Current track

Title

Artist