Kaapstadse man skuldig bevind nadat hy met hondjies bedel

3 Oktober 2022

‘n Kaapstadse man is in die landdroshof skuldig bevind aan dieremishandeling, en aanranding nadat hy hondjies gebruik het om vir geld te bedel.

Volgens die Dierebeskermingsvereniging in die Kaapse Goeie Hoop mag diere ingevolge die metro se wet oor die besit van diere, nié vir bedel gebruik word nie.

Luidens ‘n verklaring deur die DBV is Selwyn Taylor reeds vroeër vanjaar in hegtenis geneem omdat hy die hondjies langs die pad verkoop het, en hulle ook gebruik het om geld te bedel. Volgens die DBV se woordvoerder, Marisol Gutierrez was Taylor aggresief toe inspekteurs die hondjie by hom wou wegneem, en is een van die inspekteurs aangerand.

Taylor is gevonnis tot ‘n boete van R1000 of 30 dae gevangenisstraf, met ‘n verdere drie jaar opgeskorte vonnis van R2000 of 60 dae gevangenisstraf.

“Die DBV het verskeie klagtes ontvang van gemeenskapslede oor Taylor se gebruik van diere. Hy het hom egter nie aan ons verskeie waarskuwings gesteur nie,” sê die Hoof inspekteur, Jaco Pieterse.

Hy sê hulle hoop die skuldigbevinding en vonnis sal dien as ‘n waarskuwing vir mense om nie ander se goedhartigheid te misbruik nie.