Gerugte oor globale resessie voortydig

Deur on Aug 21, 2019

Nuuskommentaar: 21 Augustus

Sowat ‘n dekade na die finansiële krisisse in die Verenigde State van Amerika en daarna in Europa, bestaan daar nou weer vrese vir nuwe ekonomiese uitdagings. Verskeie ekonome en kommentators het die afgelope week of twee daarop gewys dat ‘n resessie in die Euro-sone, Brittanje en die VSA moontlik is en dat dit na die res van die wêreld kan versprei.

Die belangrikste om te erken is dat die huidige ekonomiese uitdagings in veral Europa van ‘n ander aard is as dié wat die Europese skuldkrisis van 2009 veroorsaak het. Tóé was dit veral banke in Griekeland, Spanje en ander Suid-Europese lande wat in die moeilikheid beland het en wat deur Noord-Europese lande uitgehelp moes word. Vandag sien ons gesonde ekonomiese groei in Spanje, Griekeland en Portugal en matige groei in Italië, terwyl die huidige verlangsaming eerder in die Noorde van Europa plaasvind.

Duitsland se ekonomie het in die tweede kwartaal van vanjaar met 0,1% gekrimp en sou dié tendens soos verwag in die huidige kwartaal voortduur sal dit beteken dat Duitsland in ‘n resessie verkeer. Die Duitse ekonomie is die vierde grootste in die wêreld en die grootste in Europa en baie ander Europese ekonomieë is afhanklik van uitvoere na Duitsland.

Ook in die tweede en derde grootste ekonomieë van die wêreld, China en Japan, bestaan daar kommer vir ekonomiese probleme. Japan se uitvoere het in Julie vir die agste maand in ‘n ry afgeneem. Die Chinese ekonomie beleef ook ernstige uitdagings met laer ekonomiese groei en toenemende werkloosheid terwyl maatskappye hul produksie na ander, meestal Asiatiese lande skuif, uit vrese vir die handelsoorlog met die VSA.

Daar is ook heelwat gerugte oor ‘n komende resessie in die VSA. Dit is egter totaal voortydig. Die Amerikaanse ekonomie is tans nog besonder sterk en toon minder uitdagings as die volgende drie groot ekonomieë van die wêreld.

Volgens die Instituut van Voorraadbeheer in die VSA is produksie in dié land steeds aan die toeneem, terwyl algemene voorraadvlakke en pryse bly daal. Werkloosheid is byna afwesig met ernstige arbeidstekorte in sommige industrieë waar daar veral oor die somermaande ekstra arbeid benodig word. Verder het die gemiddelde inkomste per huishouding na belasting oor die eerste helfte van 2019 met 3,3% toegeneem, terwyl spaarkoerse tot ‘n uitstekende 8,1% gestyg het. Dit beteken dat Amerikaners heelwat meer geld het om te spandeer.

Uitvoere maak slegs 13% van die Amerikaanse ekonomie uit en dit is veral plaaslike koopkrag wat ekonomiese groei in die VSA dryf. Daarteenoor is China, Japan en Duitsland baie meer afhanklik van uitvoere. Ook Brittanje is afhanklik van uitvoere en ook dié land se ekonomie, die vyfde grootste in die wêreld, is weens onsekerheid oor Brexit, onder heelwat druk.

Dat ‘n volgende ekonomiese krisis of resessie heelwat lande oor die volgende paar maande kan tref is so, maar daar is min rede om te glo dat ‘n groot, globale krisis soos in 2008 en 2009 weer op die horison is. ‘n Spoedige handelsooreenkoms tussen die VSA en China, verhoogde spandering op infrastruktuur in Duitsland, ‘n ordelike Britse uittrede uit die Europese Unie en verdere ekonomiese herstel in Suid- en Oos-Europa kan alles bydra tot ‘n matige ekonomiese verswakking wat oor ‘n jaar of twee weer verby kan wees.


Laat 'n boodskap

Laat ń boodskap

Jou e-pos adres sal nie gepubliseer word nie. Verpligte velde is gemerk *



Current track

Title

Artist