“Aanstelling van EFF-raadslid as Tshwane-burgemeesterskomiteelid klap in gesig van Afrikaners”

16 Oktober 2024

Die VF Plus het die aanstelling van die EFF-raadslid, Obakeng Ramabodu, as ʼn burgemeesterskomiteelid in die Tshwane-metro ten sterkste veroordeel.

Dit kom nadat die DA se Cilliers Brink onlangs, deur middel van ‘n mosie van wantroue, uit sy pos as burgemeester verwyder is. ActionSA se dr. Nasipi Moya is in sy plek as burgemeester aangestel, waarna sy haar burgemeesterskomitee aangekondig het.

Vyf van die burgemeesterskomiteelede is van die ANC, twee van die EFF, twee van ActionSA en een van die GOOD-party.

Die VF Plus-raadslid in die metro, Grandi Theunissen sê Ramabodu se aanstelling as die burgemeesterskomiteelid van omgewingsake en landbou is ‘n klap in die gesig van Afrikaners.

Ramabodu het vroeër tydens ʼn raadsvergadering gesê dat hy graag “ʼn boer wil moer” en hy soek die “bloed van ʼn Afrikaner op sy hande”. Theunissen meen Ramabodu is deurlopend tydens raadsvergaderings “nie net blatant rassisties nie, maar spreek sy haat teenoor witmense en in die besonder die Afrikaner uit.”

Hy sê dit is totaal onaanvaarbaar dat ʼn persoon wat openlik vyandiggesind is teen ʼn groot gedeelte van die gemeenskap toegelaat word om ʼn leierskapsposisie in die metro te beklee.

“Die VF Plus sal as opposisieparty seker maak dat die nuwe burgemeesterskomitee optree in belang van al die inwoners van die metro.”