ANC praat met ‘n gevurkte tong oor die grondwetlike regte van Afrikaans

Deur on Jun 11, 2019

Nuuskommentaar: 11 Junie

Tydens ʼn ontmoeting met Afrikaanse organisasies in Kaapstad op 15 Mei 1996 en net na die aanvaarding van die finale grondwet sê president Nelson Mandela die volgende: “Die argument wat gevoer kan word vir die behoud, beskerming en vertroeteling van Afrikaans is sekerlik nasionaal eerder as seksioneel. Dit is ‘n Suid-Afrikaanse taal wat, volgens alle standaarde, merkwaardig presteer het in terme van ontwikkeling as ‘n taal van wetenskaplike, akademiese en algemeen-intellektuele uitdrukking. ‘n Nasie wat sy intellektuele prestasies op prys stel, sal uit sy pad gaan om die middele van daardie prestasies te beskerm en te bevorder. Dit, glo ek, is die groot en sterk argument vir Afrikaans.”

Hierteenoor kom die LUR vir Onderwys in Gauteng, Panyaza Lesufi, en sê volgens Beeld van 20 Mei 2019:  “dit gaan sy verstand te bowe dat die partye vir Afrikaanse onderrig baklei. Mnr. Lesufi sal seker verbaas wees om te verneem dat Afrikaans die derde grootste verbruikerstaal in die land is en dat die toekoms van Afrikaans nasionaal en Internasionaal selfs nog groter hoogtes gaan bereik in die Wetenskap, tegnologie en kunste want dit besit reeds wonderlike kwaliteite en erkenning. Die huidige onderdrukking van die taal is maar slegs ʼn tydelike insinking weens die verpolitisering daarvan deur kortsigtige beleid van onbevoegde kaders wat tans tydelik in posisies is maar nooit die taal permanent sal kan onderdruk nie.

Dit is verstommend dat ʼn persoon wat die politieke hoof is van ʼn departement in Gauteng waar daar by skole met Afrikaans gewoeker word, sulke onsinnighede, wat grens aan die naïewe, kan kwytraak.  Met die argument hang die, nie meer so bedekte ideologiese onderrok van Panyaza Lesufi,  lelik uit en kan die lyn getrek word na die deurlopende agenda wat die heeltyd teen Afrikaans op alle vlakke van onderrig gerig word.  Dit is hierdie een of twee vrot eiers wat nasiebou skaad en hulle eie agendas is ʼn verleentheid vir alle trotse Suid-Afrikaners, ook vir die President, wat gewis hierop sal moet reageer.

Wat  nog meer verstommend is, is dat Lesufi se uitsprake lynreg bots met die President van die ANC, mnr Cyril Ramaphosa, se versekeringe oor Afrikaans wat so onlangs as 29 April 2019 in die Atterbury Teater in ʼn gesprek met meningsvormers en belanghebbendes gemaak is.  “We cannot want Afrikaans to die. Afrikaans must not die. It is a valuable and important language. Our constitution dictates that we must protect it. It dictates that we must promote it. It dictates that we must preserve it. It is precisely what we are going to do. We are going to preserve Afrikaans.”

Die ANC en ook mnr Ramaphosa moet nou onomwonde sê of Lesufi die ANC se agenda met Afrikaans bepaal en verwoord, en of daar werklik ʼn politieke wil is om die grondwetlike regte van die  Afrikaanse gemeenskap te respekteer en selfs te bewaar, te bevorder en te beskerm soos deur die President verwoord.

Verengelsing is beslis nie die oplossing vir Suid-Afrika se onderwysprobleme nie en net so is Afrikaans alleen ook nie die oplossing nie.

Veel eerder moet die oplossing gesoek word in die strewe na uitnemendheid deur kwaliteit moedertaal onderrig.

Aangesien moedertaalonderwys een van die belangrikste fondamente vir die bevordering en beskerming van die regte van kultuur-, godsdiens- en taalgemeenskappe is,is dit dringend noodsaaklik dat die regering moet herbesin oor moedertaalonderrig vir alle Suid-Afrikaners. Oor en oor is bewys dat taal lei tot prestasie. Ongelukkig is hierdie beginsel versaak en is die taalprestasie van Suid-Afrika se skoolbevolking baie swak. Van die redes wat aangevoer word was juis swak onderrig en die noodsaak vir moedertaalonderrig.

Dit is eenvoudig so dat indien die regering nie stappe gaan doen om die omstandighede te skep vir die ontwikkeling en gebruik van al ons amptelike tale, soos vereis word deur art 6 van die Grondwet nie, die vooruitsigte vir ons inheemse tale – en vir die toekomstige opvoeding van kinders uit die betrokke taalgroepe – uiters negatief sal wees.  En dit beteken bo alles dat veel groter erkenning verleen moet word aan die rol van moedertaalonderrig in ons onderwysstelsel. 

Al wat die regering tot dusver reggekry het, met Lesufi in die voorste linie, was om die ander  tale in Suid Afrika af te skaal en ‘n swak en gebroke Engels in die plek daarvan te stel. Die miskenning van moedertaalonderrig word deur elke gemeenskap in ons land  ondervind. Hiervan is die deurlopende jaarlikse Matriek uitslae-fiasko ‘n lewende voorbeeld van taalwanorde in die onderwys.


Laat 'n boodskap

Laat ń boodskap

Jou e-pos adres sal nie gepubliseer word nie. Verpligte velde is gemerk *



Lees verder

Current track

Title

Artist