MEER OOR ONS

WIE IS ONS EN WAAR KOM ONS VANDAAN

Pretoria FM is ‘n gemeenskap-gebaseerde radiostasie gevestig in Pretoria, Suid-Afrika. Ons programme is gerig op Afrikaners wat passievol is oor musiek. Ons saai 24 uur per dag uit op 104.2 FM.

Ons Programme

Kliek hier VIR meer inligting oor ons programme

KONTREIDAGBOEK EN WERKSGELEENTHEDE

Kontreidagboek en Werksgeleenthede

KONTREIDAGBOEK

Vanaf 26 April tot 5 Mei bied die Gereformeerde Kerk Hartbeespoort die immergewilde Herfsmark vir die sewende keer aan op die kerk se terrein in Maraisstraat Hartbeespoort. Die mark is oop vanaf 9 uur soggens […]

NUUSKOMMENTAAR

Nuuskommentaar

Nuuskommentaar: 19 April

Die nasionalisering van goeie diens en billike pryse

Die swak prestasie van staatsondernemings was die laaste paar weke in die kollig. Aan die een kant is daar die sukkelende Suid-Afrikaanse Lugdiens wat gereeld bakhand […]

Facebook

Jerm ... Sien MeerSien Minder

Besoek ons op Facebook

Minstens twee suksesvolle optogte is tot dusver in Australië - onderskeidelik in Brisbane en Perth - gehou vir Suid-Afrikaners wat op ‘n gereelde basis te make het met plaasmoorde en nou ook die opsie vrees dat grond moontlik sonder vergoeding onteien kan word.

Die organiseerder van die optogte, Arno Nel, woon al 17 jaar in Australiê, maar is nou in SA en het met James Kemp van Klankkoerant kom gesels.
... Sien MeerSien Minder

Besoek ons op Facebook

Die nasionalisering van goeie diens en billike pryse

Die swak prestasie van staatsondernemings was die laaste paar weke in die kollig. Aan die een kant is daar die sukkelende Suid-Afrikaanse Lugdiens wat gereeld bakhand staan by belastingbetalers om op die been te bly. Die vakbond Solidariteit, gaan juis binnekort die hof nader om die regering te dwing om SAL onder sakeredding te plaas. Volgens Solidariteit se navorsing het elke belastingbetaler al in die omgewing van R7 700 bygedra om SAL aan die lewe te hou. Die regering is tans in die proses om `n reddingsboei van R13 miljard aan die lugdiens te gee - `n slegte belegging gegewe die feit dat SAL verlede jaar `n verlies van R5,6 miljard gely het. Intussen het die staatsbeheerde lugredery `n redelike monopolie op lugvaart in Suid-Afrika aangesien privaatrederye nie daarin kan slaag om met `n gesubsidieerde lugredery mee te ding nie.

Dan is daar die kragvoorsiener Eskom. In Eskom se geval het hy geen kompetisie nie aangesien privaat ondernemings nie elektrisiteit aan huishoudings mag verkoop nie. Eskom het `n volledige monopolie op die mark maar selfs met die alleenreg om as kragvoorsiener op te tree maak hy `n volledige mislukking daarvan en wil bykans jaarliks elektrisiteitstariewe verhoog. Op 11 Mei vanjaar gaan Eskom die Nasionale Energiereguleerder van Suid-Afrika versoek om elektrisiteitspryse te verhoog sodat R67 miljard van verbruikers verhaal kan word. Dit beteken `n prysverhoging van 30 persent of meer.

Indien argumente ten gunste van privatisering gelewer word is daar diegene wat skepties reageer en sê dat dit slegs verryking van kapitaliste tot gevolg sal hê en die uitbuiting van die armes. Eintlik is presies die teenoorgestelde waar. In die stadium word Eskom se tariewe eensydig vanuit een oord bepaal. Indien kragvoorsiening `n mededingende bedryf was met verskillende maatskappye wat teen mekaar meeding sou huisgesinne die voorreg gehad het om die goedkoopste diensverskaffer te kon kies.

Om dinge te vererger is daar nie eers sekerheid dat Eskom volhoubaar elektrisiteit kan lewer nie. Dit het nou aan die lig gekom dat sewe van die steenkoolkragstasies se steenkoolvoorraad is onder die voorgeskrewe vlak. Intussen het die hoof van kragopwekking by Eskom, Thava Govender gesê dat hulle nie kan waarborg dat daar nie beurtkrag sal wees die komende winter nie. Net twee jaar gelede het president Jacob Zuma egter gesê dat beurtkrag iets van die verlede is en dat Suid-Afrika binnekort ook oor surpluskrag sal beskik wat weer verkoop kan word. Iemand het by geleentheid gespot en gesê dat Eskom seker die enigste maatskappy is wat wil hê dat jy minder van hulle produk moet gebruik.

Met dit alles gesê bly dit verstommend dat daar steeds diegene is wat `n pleidooi vir verdere nasionalisering en argumente teen privatisering lewer. Met die daarstel van privaat ondernemings wat teen mekaar meeding sien ons beter dienslewering en mededingende pryse. Met `n sosialistiese bestel waar staatsondernemings aan die orde van die dag is sien ons dat daardie gehalte diens en mededingende pryse weggenasionaliseer word.
... Sien MeerSien Minder

Besoek ons op Facebook

Afrika in ‘n Westerse pak klere . . .

Die ANC het waarskynlik ‘n groot groep Suid-Afrikaners vervreem met sy hantering van Winnie Madikizela-Mandela se afsterwe en begrafnis. Selfs mense wat die radio sagter gedraai of die televisie afgeskakel het, kon nie help om te wonder oor die skynheiligheid wat met die oud-ANC-aktivis se dood gepaard gegaan het nie. Sy het skielik ‘n wapen geword in die ANC se verkiesingstryd – al is die party op haar gedenkdiens daarvan beskuldig dat hulle haar verstoot en verneder het. Die EFF-leier, Julius Malema, was oudergewoonte gou om munt te slaan uit die omstandighede en homself te verheerlik. Familielede van die voormalige eggenote van Nelson Mandela het nie doekies omgedraai in hulle huldeblyke nie. Beskuldigings is oor en weer geslinger en na afloop van die 10-dae van rou wat vir haar afgekondig is, hoop menige Suid-Afrikaner dat daar nie gou weer ‘n ANC-strydros sneuwel nie. Dit is onverstaanbaar dat ‘n regerende party hom skuldig kan maak aan soveel mensverering en mens- verheerliking. En dit dui ook op ‘n gebrek aan wasdom en balans. Om dan nog munt uit die situasie te probeer slaan deur die eie ek op die voorgrond te druk, is moeilik om te begryp. Geen regering behoort toegelaat te word om so uitspattig op te tree nie – veral nie in dié tyd wat die Pase gedenk word nie. Suid-Afrika het nie absolute koningskappe nie en dit was nog nooit die gebruik om mense in praalgrafte ter ruste te lê nie. Dit is ironies dat daar sovel klem op Suid-Afrika as ‘n demokrasie geplaas word, maar dat die landsregeerders ‘n byna donker Middeleeuse benadering tot die dood het. Na oud-president Nelson Mandela se afsterwe het die land ook tot stilstand gekom. Dit was ‘n bietjie meer verstaanbaar omdat hy in een stadium die staatshoof was. Agterna het die vele bewerings oor geldverduistering met die vervoer van begrafnisgangers in die Oos-Kaap egter die geleentheid ‘n wrang smaak laat kry. So ook talle politici se uitbuitery van sy naam om geld en stemme na die ANC se kant te laat kom. Mandela het ‘n reënboognasie in gedagte gehad, ‘n land wat volgens die ANC se Vryheidsmanifes aan almal behoort wat daarin woon. Dit het egter in die Zuma-jare ‘n stille dood gesterf en plek gemaak vir die aanhoudende verkleinering en selfs onderdrukking van bepaalde minderheidsgroepe. Het iemand al agtergekom dat Suid-Afrika stelselmatig besig in om van ‘n eens moderne republiek na ‘n Afrika-bestel te verander? Een waar begrafnisse ten koste van die ekonomie uitgerek word en die Christelike lewenstyl plek moet maak vir stamgebruike soos menslike aanbidding. . .
... Sien MeerSien Minder

Besoek ons op Facebook

Lang en moeilike pad van herstel lê in Irak voor

Volgende maand sal kiesers in Irak kan besluit of Eerste Minister Haider al-Abadi tot ’n tweede termyn verkies moet word. Verlede maand was dit presies vyftien jaar sedert die Amerikaanse inval in Irak in Maart 2003.

Volgende maand se verkiesing en die gebeure van die afgelope vyftien jaar kan nie apart van mekaar gesien word nie. Daar is vandag steeds vyfduisend Amerikaanse soldate in Irak en dit is nog net enkele maande sedert die land se regering in Desember 2017 verklaar het dat die Islamitiese Staat-terreurgroep verslaan is.

Groot dele van Irak is oor die afgelope 15 jaar verwoes. Volgens berekeninge van die Wêreldbank en die Irak-regering is minstens agt-en-tagtig miljard Amerikaanse dollar nou nodig om die sewe provinsies wat die ergste deur oorlog geraak is, weer funksioneel te kry. Hierdie bedrag verwys nie na die volle herstel aan infrastruktuur nie, maar net na die fondse wat nodig is om funksionele regering weer moontlik te maak en die land se belangrike olie- en gasinfrastruktuur te herstel.

Intussen word daar ernstige vrae in aanloop tot die parlementêre verkiesing op 12 Mei oor die voortdurende betrokkenheid van die Amerikaanse weermag en oor die roete om te volg met die heropbou van Irak, gevra. ’n Mosie wat die regering verplig om ’n tydraamwerk vir die onttrekking van buitelandse soldate daar te stel, is op 1 Maart in die parlement goedgekeur. Die Soenniete-minderheid van provinsies in die weste en noorde het die mosie teengestaan, maar Sjiïete uit die suide en ooste het oorweldigend ten gunste daarvan gestem.

Terwyl duisende vlugtelinge deesdae na Irak terugkeer, winkelsentrums, koffiewinkels, parke en biblioteke heropen en daar in groot dele van Irak weer relatief veilige omstandighede heers, is daar ook ongelukkigheid onder ’n groot deel van die land se bevolking.

Die Sjiïete-meerderheid het vir lank gewens vir die dag wat Saddam Hoesein, ’n Soenniete-diktator, onttroon kon word. Die manier waarop dit egter in 2003 gebeur het en die domino-effek wat tot vyftien jaar se chaos en swaarkry aanleiding gegee het, het egter meegebring dat ’n groot deel van die Sjiïete-bevolking baie negatief oor die Amerikaanse teenwoordigheid in Irak is.

Daarmee saam is daar wydverspreide korrupsie in Irak. Terwyl Soenniete-gebiede deur die oorlog met die Islamitiese Staat verwoes is, het armoede in die oorweldigende Sjiïete Basra-provinsie, waar die meeste van Irak se olie ontgin word, skerp toegeneem. Dwelmmisbruik het sodanig toegeneem dat die regering onlangs soldate na Basra moes stuur om wet en orde te probeer herstel.

Nadat die Irak-weermag in samewerking met die Amerikaners in 2010 Al-Kaïda verslaan het, was daar heelwat hoop op ’n beter toekoms vir Irak. Kort daarna het die Islamitiese Staat op die voorgrond verskyn en het chaos gevolg. ’n Mens kan dus verstaan dat die mense van Irak sukkel om baie optimisties oor die toekoms te wees. Volgende maand se verkiesing sal een stap in ’n lang pad van herstel vir Irak wees.
... Sien MeerSien Minder

Besoek ons op Facebook
Hearing test provided by hearX Group